O Consello Regulador da Agricultura Ecolóxica de Galicia (Craega) e a Consellería do Mar da Xunta de Galicia renovaron a colaboración para seguir potenciando o consumo e difusión dos produtos ecolóxicos de Galicia que proveñen do mar, o que redundará na mellora da situación socioeconómica dos territorios que viven desta actividade.
Alfonso Villares, conselleiro do Mar, e Francisco López Valladares, presidente do Craega, asinaron este mércores o acordo que rexe a colaboración. Así, baixo a denominación “Ecolóxicos a Mares”, desenvolveranse novamente distintas accións en espazos públicos, que ofrecerán unha experiencia culinaria única.
Así, nos campus universitarios de Galicia, a través dunha experiencia sensorial, informativa e lúdica, convidarase ao estudantado e persoal universitario a descubrir a riqueza dos produtos certificados e a incorporalos á súa alimentación diaria. Para iso, instalarase un posto onde os asistentes poderán degustar delicias do mar coa certificación ecolóxica e que son: mexillóns, conservas e algas. Neste senso, ademais de catar o seu sabor, poderán coñecer os seus beneficios nutricionais e ambientais grazas ao material informativo dispoñible no espazo.
Ademais, promoverase o uso das redes sociais como canle de difusión da iniciativa, incentivando a participación mediante o uso de etiquetas e retos que fomenten os valores da acucultura ecolóxica. A través tamén de distinto material divulgativo, xerarase un impacto visual forte e comunicaranse de maneira efectiva as vantaxes dos alimentos ecolóxicos do mar de Galicia.
Á execución destas actuacións, que teñen un orzamento total de 80.00 euros, a Consellería do Mar destina 40.000, co-financiados polo Fondo Europeo Marítimo de Pesca e de Acuicultura (Fempa).