Ovos Corazón de Galicia, unha empresa que se sitúa en Chantada (Lugo), nace no 2023 e conta coa certificación do Craega. Roberto López, o impulsor deste proxecto, cóntanos nesta entrevista todos os detalles sobre a iniciativa e comparte a súa opinión sobre a produción en ecolóxico.
Como naceu este negocio e en que ano?
Este negocio naceu no 2017. Montamos a granxa para unha integración e no 2023 saímonos e intentamos facer nós a nosa propia distribución e a nosa marca.
Como é un día normal no voso traballo?
Un día normal no noso traballo é un día moi longo, porque hai que vir, recoller, botar as galiñas, volver á tarde metelas, clasificar, e aparte diso somos un pouco valentes e decidimos facer nós o reparto ás tendas directamente, para que non chegue o ovo roto e non haxa problemas.
Ata onde chegan os vosos ovos? Onde e como se poden mercar?
Os nosos ovos están nas tiendas físicas pequenas de ecolóxico. En Galicia intentamos chegar a onde podemos, e o resto hai que intentar vendelo igualmente.
Sempre producistes en ecolóxico, desde os inicios? Como se deu esta idea?
Si, desde os inicios sempre producimos en ecolóxico. Desde o 2018 estamos certificados co Craega.
A idea inicial non era esta, senón que ía facerse unha granxa dedicada a vacún, pero por circunstancias ofrecéronnos montar isto e démoslle para adiante, en ecolóxico.
Por que é importante ter a certificación do Craega? Que beneficios vos achega?
A certificación do Craega vale para todo, principalmente para defender o que queremos e o que temos aquí. En Galicia podemos ter todo ecolóxico, sen problema ningún. Á hora de chegar ás tendas, ao levar o selo do Craega, non hai moito máis que dicirlles. Todo o que sexa o selo do Craega, admítenno.
Que teñen de especial os ovos que se producen en ecolóxico? Cales son as diferenzas cos convencionais?
A diferenza dun ovo ecolóxico cun convencional ou cun campeiro é que aquí non se lles pode dar medicamentos nin nada ás galiñas. Se baixa a posta o mellor que temos é que estean fóra, que coman o pasto, non se lles pode facer nada máis. Aí está a diferenza do ovo. Ás veces temos problemas con isto porque a xema é máis clariña e a xente di que é moi clara, pero esa é a realidade do ovo ecolóxico e a diferenza.
Tedes barreiras que vos dificulten o traballo diario co tema de producir en ecolóxico ou tivéstelas nalgún momento para conseguistes superalas?
Realmente o problema do ecolóxico é un pouco o consumidor, porque pensan que o que teñen na casa é moito mellor que o que está realmente certificado.
Eu teño os ovos da casa e non pasan as certificacións, non pasa o veterinario da Xunta de Galicia, non pasa ninguén. Temos que intentar cambiar a mentalidade da xente nese sentido.
Como se podería intentar convencelos?
É complicado, sobre todo coa xente maior. A xente máis nova si que o entende e si que o ve.
Hai algo que vos gustaría que mellorase no proceso de obtención da certificación?
Non, a certificación está ben. Hai unhas leis e hai que cumprilas. Xa non é cumprir as leis, e que para que sexa ecolóxico, tense que facer así.
Por que a xente debería consumir produtos ecolóxicos?
A xente debería consumir produtos ecolóxicos para coidar o seu propio corpo, todo o que metemos para dentro somos nós. Todo comeza pola alimentación.
“A xente debería consumir produtos ecolóxicos para coidar o seu propio corpo”
Que consello lle darías a alguén que quere comezar un proxecto en ecolóxico ou que xa o ten en convencional pero quere pasarse ao ecolóxico?
Que o vexa como algo no que cre, non coma un negocio.
Cales son vosos plans a futuro? Mellorar, manterse como estades, cambiar en algo…?
Os nosos plans de futuro serían poder medrar un pouquiño e mellorar no sistema de loxística: intentar ir todas as semanas ás tendas, e non semana si e semana non, pero é complicado. Sendo dous sós, é moi difícil chegar a todo.