Nesta época do ano, en pleno outono, un dos alimentos máis típicos e tradicionais para consumir en Galicia son as castañas. As ecolóxicas certificadas sobresaen pola súa calidade e polas súas propiedades, co cal supoñen unha opción moi saudable para consumir nestes meses.
Un dos froitos máis emblemáticos que posuímos na cultura gastronómica galega é a castaña, que cada vez cobra máis importancia no sector da produción ecolóxica. Coa certificación garántese que este produto tradicional cumpra cos máis altos estándares da calidade ecolóxica.
BENEFICIOS DE ESCOLLER CASTAÑAS ECOLÓXICAS
- Froito pouco calórico e baixo en graxa
- Fonte de vitaminas B1, B2, B3 e B6
- Ricas en hidratos de carbono e minerais
- Aporte natural de calcio
- Axudan a regular o colesterol
- Contido elevado en fibra
VANTAXES A LONGO PRAZO
As castañas ecolóxicas certificadas non só achegan nutrientes beneficiosos, senón que ao cultivarse de maneira ecolóxica, sen pesticidas nin fertilizantes sintéticos, conservan as súas propiedades sen residuos químicos nocivos. Isto reduce a exposición do consumidor a produtos tóxicos, o que se traduce nunha opción máis segura e saudable.
Ademais, o seu alto contido en antioxidantes contribúe a combater o envellecemento celular e o desenvolvemento de enfermidades crónicas. Os estudos tamén inciden en que poden mellorar a saúde cardiovascular e fortalecer o sistema inmune grazas á pureza do produto, que evita a inxestión de compostos daniños.
IMPACTO AMBIENTAL POSITIVO
A produción de castañas eco certificadas segue principios sostibles que respectan o equilibrio natural dos ecosistemas forestais galegos. As castañas ecolóxicas cultívanse en solos libres de químicos sintéticos, promovendo a biodiversidade e favorecendo a rexeneración dos bosques. Este enfoque non só contribúe á fertilidade do solo a longo prazo, senón que tamén evita a contaminación de acuíferos e protexe a fauna local.
De feito, a recolleita e a produción tamén xogan un papel clave na loita contra o cambio climático. Ao fomentar a silvicultura sostible, redúcese a deforestación e promóvese a captura de carbono, contribuíndo a mitigar as emisións de CO2. As castañas ecolóxicas, polo tanto, son un exemplo de como un modelo de produción baseado na ecoloxía beneficia tanto ao consumidor coma ao medio ambiente.
UN IMPULSO NA ECONOMÍA LOCAL
A produción de castañas ecolóxicas xunto coa certificación do Craega abre novas oportunidades de negocio para os pequenos operadores, que ven unha vía para obter un valor engadido, diferenciándose nun mercado cada vez máis competitivo.
Ademais, a recolleita e o cultivo das castañas axuda a fixar poboación no rural e xera emprego, evitando a migración cara a núcleos urbanos. As castañas eco son tamén, polo tanto, unha aposta para o desenvolvemento socioeconómico de Galicia.
LEMBRA BUSCAR O SELO
É importante prestar atención ao etiquetado dos alimentos escollidos para asegurarnos de que realmente son ecolóxicos:
- O logotipo ecolóxico europeo consiste nunha folla perfilada con estrelas sobre fondo verde; este é sempre obrigatorio acompañado do código de control da nosa comunidade autónoma ES-ECO-022-GA.
- O selo de garantía Craega é a etiqueta que demostra que o alimento foi producido de maneira respectuosa co medio ambiente sen a intervención de elementos ou procesos químicos. Obtense despois de demostrar de maneira fidedigna que o produto é totalmente ecolóxico, con controis en cada fase da produción, elaboración e comercialización cumprindo coa normativa do Regulamento (UE) 2018/848 do Parlamento Europeo e do Consello.
