Filloas, roscas, orellas… son moitas as sobremesas que comemos en Galicia durante a época do Entroido. Nestas ocasións especiais, un bo doce non amarga a ninguén; porén, se os elaboramos con produtos ecolóxicos certificados, estes alimentos non só serán máis saudables para nós, senón tamén máis respectuosos co medio ambiente.
BENEFICIOS DOS POSTRES ECOLÓXICOS
Estes doces achegan múltiples beneficios á nosa saúde, o que nos axuda a poder desfrutar con tranquilidade deste tipo de celebracións. Isto débese a que os seus ingredientes se cultivan sen pesticidas nin químicos.
Os ingredientes que máis se adoitan utilizar nestes doces son froitas frescas, adozantes naturais e fariña integral. Estes proporcionan, ademais dun sabor auténtico os nosos postres de Entroido, nutrientes esenciais para o noso corpo.
Algunhas das vantaxes de optar polos doces de Entroido ecolóxicos son:
- Non conteñen aditivos nin conservantes artificiais
- Achegan máis vitaminas, minerais e antioxidantes
- Son máis fáciles de dixerir
- Uso de adozantes naturais como mel, xarope de pradairo ou estevia
- Contan con graxas máis saudables
- Son menos propensos a xerar reaccións alérxicas ou intolerancias
Así pois, o feito de escoller postres ecolóxicos pódenos axudar a previr enfermidades crónicas e mellorar o benestar xeral. As vitaminas, minerais e antioxidantes que conteñen fortalecen o sistema inmunolóxico e promoven unha dixestión saudable.
Este Entroido, aposta polos doces ecolóxicos certificados e goza dunhas festas máis saudables e sostibles!
O PAN ECOLÓXICO CERTIFICADO, OUTRA DELICIA IMPERDIBLE
Dentro do contexto dos postres ecolóxicos, non podemos deixar de facer mención ao pan ecolóxico certificado, a estrela das panaderías ecolóxicas.
O pan ecolóxico elabórase con fariñas certificadas. como as de trigo, trigo sarraceno, espelta ou centeo, en moitos casos integrais ou semiintegrais, obtidas de cultivos sen produtos químicos de síntese. Tampouco se utilizan organismos modificados xeneticamente e o número de aditivos é limitado, ademais de que deben ser de orixe natural.
En resumo, ao escoller pan ecolóxico certificado, non só melloramos a nosa alimentación, senón que tamén apoiamos unha agricultura máis sostible e responsable.
LEMBRA BUSCAR O SELO
É importante prestar atención ao etiquetado dos alimentos escollidos para asegurarnos de que realmente son ecolóxicos:
- O logotipo ecolóxico europeo consiste nunha folla perfilada con estrelas sobre fondo verde; este é sempre obrigatorio acompañado do código de control da nosa comunidade autónoma ES-ECO-022-GA.
- O selo de garantía Craega é a etiqueta que demostra que o alimento foi producido de maneira respectuosa co medio ambiente sen a intervención de elementos, compoñentes ou procesos químicos. Obtense despois de demostrar de maneira fidedigna que o produto é totalmente ecolóxico, con controis en cada fase da produción, elaboración e comercialización cumprindo coa normativa do Regulamento (UE) 2018/848 do Parlamento Europeo e do Consello.
